Museo Tula

Museo Tula, di kua e nòmber ta dediká na Tula, lider di e rebelion di 1795, a habri su portanan ofishalmente dia 18 di mei 2007.  Museo Tula  ta enfoká riba e herensha afrikano di Kòrsou, en espesial área di Bándabou, i su influensha den nos bida pasado, presente i futuro. Den e museo ta eksponé tradishon i kustumber di nos antepasadonan: kustumber i tradishonnan  ku nos a heredá i te awe ta bíbu den nos poblashon.

Museo Tula ta situá den e monumental Landhuis Knip na Kenepa. Kenepa ta un di e áreanan mas  históriko di Kòrsou. Einan indígenonan Caiquetio a habitá i tambe kaminda e rebelion di esnan sklavisá a kuminsá na aña 1795. Plantashon Kenepa ta herensia di nos historia, konstruí na aña 1696 i un di e plantashonnan mas bieu i  importante di Bandabou. Na aña 1830 a renobá e plantashon ku karakteristika di siglo 19.

Museo Tula ta ofresé:

Guia den i rònt museo.

Den e museo lo bo kontra e siguiente temanan:

  • Nansementu i Morto
  • Kas di pal’i Maishi
  • Artefaktonan di Kushina
  • Instrumentonan Musikal
  • Ritualnan di Protekshon
  • Weganan di ántes

Guia den naturalesa rònt e lanthùis

Benta di produktonan, arte i artesania lokal

Un terasa

Diferente tayer manera tayer di mara lensu, plantamentu, pintamentu, traha kos dushi, traha pan será.

Preis di entrada

E preis di entrada di Museo Tula ta inkluí un guia interaktivo den museo, di mas o ménos 45 minüt .

Entrada ta:

  • Lokal: Fls 7,- adulto I mucha Fls 3,50.
  • Turista: adulto $4,- / mucha $2,-
  • Grupo di adulto di mas ku 10 persona: Fls 5,- p.p inkluí guia.
  • Skolnan Básiko :Fls 2,- pa alumno i dosente Fls 3,-. Esaki ta inkluí guia i seshon di weganan di antes.

Orarionan di bishita

Por bishitá Museo Tula di djaluna pa djabièrnè, di 9.00 pa 15.30 i djasabra i djadumingu di 9.30 pa 15.30. Pa mas informashon por tuma kontakto na +5999-8886396. Konsultá tambe nos wèpsait www.kasdikultura.cw i facebook page Fundashon Kas di Kultura