E logo di Kas di Kultura ta simbolisá un kas, kargá pa 7 vas den funshon di pilá.

Den e logo bo por distinguí:

Nos Tera (Forma di Pais Kòrsou)
Nos Lenga ‘Papiamentu’ (E palabranan Kas di Kultura)
Nos Bandera (E elementonan di bandera di Kòrsou ta forma e dak)
Kada un di e vasnan ta para pa un pilá di nos sosiedat ku tin influensha supstansial den bida di kada persona di nos komunidat i ta sostené kultura. Pa nos por biba un kultura ku ta fomentá e sentido di dignidat general, ta krusial pa nos mantené kada pilá fortifiká.  E pilánan ta:

a. Edukashon/Formashon

b. Famia

c. Arte i Siensia

d. Media

e. Gobièrnu

f. Spiritualidat/Iglesia

g. Ekonomia/Komèrsio

7 pilánan di sosiedat

Tur 7 pilánan di sosiedat tin nan ròl pa afektá i sostené nos kultura. Ora ke pilánan aki gasta òf ser korumpí nan ta kai den otro. Kada pilá ta sostené e sosiedat di manera igual. Pero si un di nan ser korumpí òf gasta, e otronan ta haña nan ta karga mas (ku nan) peso. Si tur sukumbí, bo sosiedat tambe ta kai den otro. Ta p’esei nos mester restourá i reforsá e pilánan aki si nos ke reskatá i mantené nos prinsipionan.

a. E pilá di Edukashon ta enbolbí e akto di atkirí i distribuí konosementu i òf abilidat. Hopi biaha ta un di e formadónan di nos vishon pa mundu. Restourá e pilá aki ta nifiká eduká nos mes i kontribuí na edukashon di otro nan.

b. Famia ta representá e unidat esensial di un sosiedat. Ta e promé i último liña di defensa i faktor mas esensial pa sobrebibensia di un sosiedat sivil. Restourá e pilá aki ta enserá tene kuenta ku desaroyonan eksterno ku por destruí e núkleo aki i  reforsá i sigurá nos famianan internamente.

c. E pilá di Arte i Siensia  ta representá e kreatividat den kada un di nos. Hopi di e gran artistanan di mundu tabata tambe sientífiko. P. e.  Archimedes, Da Vinci and Benjamin Franklin. Restourá e pilá aki ta pidi rèspèt i desensia pa ku e mundu di arte i siensia.

d. E pilá di Media ta konsistí di prensa skibí, radio, televishon i internèt. E pilá aki tin e poder pa moldia opinion públiko i krea notisia. Pa restourá e pilá aki mester di esfuerso i akshon konsiente di kada individuo. Kada un di nos mester bira un reportero i buskadónan di e bèrdat na lugá di kualke un notisia ku ta ser propagá.  

e. E pilá di Gobièrnu ta representá e balornan kompartí i reglanan di lei di un sosiedat. E tin e poder pa krea leinan ehersé hustisia i sòru pa defensa di su pueblo. Restourá e pilá aki ta pidi embolbimentu riba un nivel lokal i tambe e realisashon ku un gobièrnu ku ta sinti akshonnan di su pueblo ta mas serka di su pueblo.

f. E pilá Iglesia òf Religion ta e fundeshi moral i kerensia mas básiko i íntimo di e ser hende. Pa restourá esaki tur hende mester konsultá ku nan esensia.

g. E pilá di Komersio/Ekonomia ta regardá nos trabou i transakshonnan. Un sektor di ekonomia sano ta tene un balansa entre produkshon, distribushon i konsumo di rekursonan i  ta trata kada individuo hustu, sin husga. Restourá e pilá aki lo nifiká trata sèn komo simplemente un instrumènt. Tambe un bon étika di trabou dor di promové nogoshinan ku ta hasi negoshi na un manera ehemplar, ku ta duna bèk na komunidat, tin norma i balornan sólido i ta ninga di hasi negoshi ku esnan ku ta hasi aktonan òf tin intenshonnan kuestionabel.