Kiko ta Siman di Kultura?

Siman di Kultura ta un siman di konsientisashon kultural pa henter komunidat di Kòrsou. Siman di Kultura no ta un siman di fiesta kultural so. E ta un siman di fiesta, di formashon, di reflekshon, di análisis, di koperashon i di union.

Durante Siman di Kultura hende ta topa otro, sera konosí ku otro, interkambiá idea i eksperensha i dialogá ku otro. Tambe hende ta traha ku otro, duna otro un man i siña di otro. Artista aktivo riba diferente ramo di arte ta kompetí sanamente ku otro loke ta alsa kalidat i stimulá ekselensia.

Hende di diferente rais kultural ta sera konosí mas profundo ku otro, ta interkambiá idea i eksperensha diferente i komun, loke ta alsa sentido síviko i rèspèt pa otro. Esaki ta stimulá, fortalesé i promové union i solidaridat.

Hende di diferente rais kultural ta sera konosí mas profundo ku otro, ta interkambiá idea i eksperensha diferente i komun, loke ta alsa sentido síviko i rèspèt pa otro. Esaki ta stimulá, fortalesé i promové union i solidaridat.

Di e forma aki Kas di Kultura ta duna un aporte konkreto na konstrukshon di e nashon Kòrsou.

Aktividatnan Kultural i Soshal ta e medio pa alkansá e metanan di Siman di Kultura. For di e momento ku organisashonnan ta bini huntu pa pensa i organisá, ya nan ta konstruyendo i edifikando e union kultural ku tantu Kòrsou mester. For di momento ku hende di e pueblo di Kòrsou bini huntu den reunion pa diskutí ku otro i traha plan, e mashin di formashon i edukashon kultural i di konsientisashon ta trahando.

Meta di Siman di Kultura ta:

Garantisá e derecho universal di tur siudadano riba kultura propio
Promové konsiensia kultural
Promové i stimulá kultura di Kòrsou
Promové i stimulá kreatividat
Pone atenshon dirigí riba diferente forma di manifestashon di kultura di Kòrsou
Pone atenshon na kultura di ántes, di awe i di mañan
Apoyá bario, famia, organisashon i artista pa organisá evento kultural artístiko
Mobilisá hinter komunidat pa partisipá i asistí na diferente evento i aktividat kultural
Stimulá union familiar rondó di kultura di Kòrsou
Promové union bou di tur siudadano