Kiko ta kultura?

Hende komo ser kreativo i sosial tin relashon ku otro (interakshon) den e sosiedat kaminda e ta biba.

Kultura ta e manera ku hende ta anda ku otro, trata otro, biba ku otro, forma famia, forma grupo, traha huntu, organisá aktividat, rekreá etc.
Kultura ta tambe e manera ku hende ta anda ku su medio ambiente (flora, founa).
E manera di anda di hende ta tuma lugá den un kuadro spesífiko di teknologia, simbolismo, idioma, balor i norma (regla e.o. lei).
Pa medio i den e kuadro kultural akí hende ta husga, pensa, opiná i tuma desishon. E manera di anda akí ta suheto na kambio konstante.
E interakshon entre hende ku hende i hende ku medio ambiente tin komo resultado ku hende ta krea tur sort’i produkto i artefakto (material) i idea (inmaterial)pa por fasilitá i aklará su bida.
Loke hende krea manera ariba menshona tambe ta forma parti di kultura.

Hende inkluso profeshonal tin tendensia di  konsiderá únikamente folklor i ekspreshon artístiko manera músika, teatro, baile, pintamentu, literatura etc. komo kultura. Esaki ta un aplikashon superfisial di e konsepto kultura. Kultura ta e totalidat kompleho di tur loke hende agrega na naturalesa. Kultura ta Bibu!!